ގދ.ތިނަދޫ މާފިޔާ ސިއްދީގު އަލީ އާއި ސޫރަޖްގޭ ފާތުމަތު ޝުއައިބާ އާދަމް އަށް ލިބުނު ދަރިފުޅު މިމަހުގެ 17 ވަނަދުވަހު، އެދަރިފުޅު ވިއްސި ޑޮކްޓަރުގެ އިހުމާލުންމަރުވެފައިވާކަމަށް ތުހުމަތުކޮށް އެމައްސަލަ ސަރުކާރުގެ ކަމާބެހޭ ފަރާތްތަކުންނާއި އިންސާނީ ހައްގުތަކަށް މަސައްކަތްކުރާ ފަރާތްތަކުން ވީހާއަވަހަކަށް ތަހުގީގު ކުރެއްވުމަށް ގދ.ދާއިރާއިން ގޮވާލައިފިއެވެ.
ގދ.ދާއިރާގެ ރައީސް މުހައްމަދު ސަލީމްއަލީ ވިދާޅުވީ މިފަދަމައްސަލަތައް ތިނަދޫރީޖަނަލްހޮސްޕިޓަލުންނާއި ރާއްޖޭގެ އެކިސަރަހައްދުތަކުން ތަކުރާރު ވަމުން ދާކަމަށެވެ. އެހެންނަމަވެސް ކަމާބެހޭ މިނިސްޓްރީން މިފަދައެއްވެސް މައްސަލައެއް ނުބައްލަވައި، އެފަދަ ޑޮކްޓަރުންނަށް އިންޒާރެއްވެސް ނުދެއްވާކަމީ ސިއްޙީ ދާއިރާގެ އެފަދަ އަމަލް ތަކަށް ދެވޭ ހިތްވަރެއް ކަމަށް ނޫނީ ނުބެލެވޭނެ ކަމަށެވެ. އެހެންވީމާ މިހާރުވެސް ހެލްތުމިނިސްޓަރު އިލްޔާސް އިބްރާހީމް ޑީއާރުޕީ ހިންގުމަށްޓަކައި ކޮންމެ ބުރާސްފަތިދުވަހަކު ރާއްޖޭގެ ރަށްރަށަށް ގޮސް ޕާޓީ ހިންގުމަށްޓަކައި ކުރައްވާ މަސައްކަތަކީ ހެލްތުމިނިސްޓްރީ ސިޔާސީ ހަތިޔާރެއްގެ ގޮތަށް ބޭނުން ކުރުން ނޫންގޮތަކަށް ނުބެލެވޭނެ ކަމަށެވެ .އަދި ރާއްޖޭގެ ހެލްތުމިނިސްޓްރީ އަކީ ސިޔާސީ ޕާޓީއެއް ހިންގާ މަރުކަޒަކަށް ވުމީ ރާއްޖޭގެ ރައްޔިތުންނަށް ހުރި ވަރަށްބޮޑުބިރެއް ކަމަށްނޫނީ ދެކެވަޑައި ނުގަންނަވާ ކަމަށެވެ.
މިމައްސަލައާ ގުޅިގެން ސިއްދީގުއަލީ ވަނީ އެމްޑީޕީ ގދ.ދާއިރާ އޮފީހުގެ އިތުރުން ހެލްތުމިނިސްޓްރީ އަށާއި ކަމާބެހޭ އެކި ފަރާތްތަކަށް ސިޓީ ފޮނުވާފައެވެ. އަދި އެސިޓީގައި ލިޔެފައިވާ ގޮތުގައި ދަރިފުޅު ވިހަންތައްޔާރު ވެފައި ވަނިކޮށް ޑޮކްޓަރު ގެއަށް ނިދަންގޮސްފައިވާ ކަމަށާއި، ދަރިފުޅު ވިއްސުމަށްފަހު ވާނުވާނޭނގި އެތައްއިރެއް ވެފައިވާ ކަމަށް ލިޔެފައިވެއެވެ.
